O buque humanitario español Open Arms reclamaba con urxencia un porto onde desembarcar os migrantes que leva a bordo, que superan a capacidade da embarcación. Son 363 persoas que rescatou en cinco operacións.

O xefe da misión denunciou que Malta lles negara o desembarco en tres ocasións e que Italia aínda non respondeu á petición. Subliñou que a situación é de amoreamento e que só lles quedan víveres para dous días.

Tras as tres negativas de Malta para o desembarco, finalmente, a última hora desta tarde Italia asignoulles o porto de Pozzalo. Alí pisarán terra os migrantes que o buque humanitario rescatou nos últimos días en cinco operacións. A noticia era recibida con xúbilo no Open Arms, aínda que recoñecen as dificultades que supón chegar ao porto italiano.