O ministro do Interior nega que o traslado de presos da ETA a cárceres próximos a Euskadi responda a un pacto con Bildu, a cambio de que apoien aos orzamentos do Estado.

Marlaska defende que se aplica o estado de dereito en cada caso de forma individualizada, unha vez que a banda terrorista, dixo, foi derrotada. O ministro responde así ás críticas das vítimas do terrorismo, que cren que Interior acelerou os achegamentos de presos.

Nos últimos cinco meses fixo 64 traslados, case o dobre dos que se autorizaran nos dous anos anteriores. As vítimas tamén lamentan que o executivo concedera o réxime de semiliberdade a 15 reclusos etarras.