O Ministerio de Industria requiriu formalmente a Alcoa a devolución de 50 millóns de euros en concepto de compensacións por custos indirectos de emisións de CO2, unha axuda que recibe a industria electrointensiva para paliar a súa elevada factura da luz.

Tanto Industria como a Xunta de Galicia advertiron en diversas ocasións a Alcoa de que esixirían a devolución das axudas públicas recibidas se persistía no peche da súa planta de San Cibrao, para a que expuxo un expediente de regulación de emprego (ERE) tras abortar a súa venda a Liberty.

A ministra de Industria, Reyes Maroto, lembrou, en declaracións a TVE, que o Goberno está a barallar todos os escenarios despois de que Alcoa rexeitara a súa oferta de comprar a planta a través da SEPI para despois vendela a Liberty.

Neste contexto, subliñou que é unha responsabilidade reclamarlle as axudas públicas recibidas porque "os cidadáns non entenden que unha empresa que recibiu tantas axudas públicas hoxe estea a cerrar e deixando sen emprego a unha comarca enteira".

"Por tanto, espero que, tanto os requirimentos do Ministerio de Industria como os requirimentos que esta semana espero saian tamén da Xunta, poñan a Alcoa na tesitura de devolver unhas axudas" que son unha parte moi importante do apoio que se lle deu desde a comarca, as familias e as administracións públicas.

Fontes de Industria apuntaron que xa requiriron formalmente ao fabricante de aluminio a devolución de 50 millóns por compensacións de custos por emisións de CO2.

A ministra reiterou que o Goberno de España está decidido a manter a planta aberta e destacou que colaboran estreitamente co executivo rexional para conseguilo.