EFE

Ignacio López del Hierro, marido da exsecretaria xeral do PP María Dolores de Cospedal, negou ante o xuíz do caso Kitchen contratar o excomisario José Villarejo, a pesar de dicirlle "por cortesía" nalgún momento, segundo consta nunha gravación, que lle ían a encargar "traballos puntuais".

O empresario declarou este mércores na Audiencia Nacional como imputado na investigación sobre a presunta operación para subtraer en 2013 ao extesoureiro do PP Luís Bárcenas documentación comprometedora para o partido, despois de que onte o fixera a súa muller, quen tamén negou contratar a Villarejo.

Cospedal dixo que se reuniu unhas catro veces con el na sede do PP ante a campaña mediática contra ela e o seu marido, ao que se vinculou cuns apuntamentos dos papeis de Bárcenas, e dadas as boas relacións do excomisario coa prensa, pero que se deu conta de que este lle contaba o que xa se publicou adornado.

Con todo, José Luis Ortiz, durante anos xefe de gabinete de Cospedal e que tamén declarou hoxe, elevou a oito ou dez as reunións que cre que esta mantivo con Villarejo e asegurou que el unicamente cumpría ordes da súa xefa. Do mesmo xeito que Cospedal quixo desvincular o PP de toda responsabilidade na Kitchen, o seu marido, ao negar facer encargos a Villarejo, destacou que el non tiña capacidade para contratar a ninguén en nome do partido, do que deixou claro que non era militante, segundo informaron a Efe fontes xurídicas.