Milleiros de persoas reuníronse esta madrugada nas praias de Barcelona para beber e facer festa, tras a blindaxe policial da praza de España, onde o venres pasado se rexistrou un macrobotellón que rematou con 22 persoas arrestadas, 40 feridas (13 por arma branca) e cuantiosos danos materiais.
Este sábado, os Mossos e a Garda Urbana de Barcelona realizaron na praza de España controis, filtros de acceso e peches perimetrais, polo que a festa se trasladou ás praias da cidade. Na do Bogatell acumuláronse grandes cantidades de envases e residuos.
Segundo diversas testemuñas, a presenza policial nos areais era escasa e pequenos grupos de mozos vestidos de negro e coa cara tapada, aparentemente organizados, aproveitaron a situación para intimidar e roubar o resto de persoas.
Máis tarde producíronse enfrontamentos coa policía e a noite acabou con, polo menos, un vehículo calcinado e diversos escaparates rotos de establecementos, algúns dos cales sufriron tamén actos de pillaxe.
