Estas son as últimas ovellas que lle matou o lobo a este veciño de Viveiro. Con estas dúas, son xa 60 as reses que perdeu nos sucesivos ataques rexistrados no último ano, malia encontrarse o gando á beira mesmo das casas na parroquia de Celeiro.

António José Liborio Nunes, dono das ovellas: "Desde abril do ano pasado ata o día de hoxe lévanme matado 60 ovellas e cabras e mais un becerro de tres meses. Isto é imposíbel de combater. Un día chegas e encóntraste con sete, outro con catorce. Hai cousa de quince días cheguei xunto o cemiterio e había catorce ovellas mortas. Antonte, dúas ovellas mortas e tres feridas, que as hai que sacrificar".
María Benedicta Otero González, dona das ovellas: "Temos outro rabaño aló arriba, no alto de Celeiro, con dous mastíns. Alí foi o primeiro ataque que tivemos, o ano pasado, pero aquí ao pé das casas, nunca. Nunca viñeran ata este ano".

Ao dono das ovellas aínda lle quedan unhas vinte reses, que está a tratar de vender antes de llas mate o lobo. Aínda que cada animal lle valeu uns 250 euros, agora desfaise deles por apenas 40.

Antonio José Liborio Nunes, dono das ovellas: "Eu estou traballando todo o ano, vén o lobo e en tres ou catro días acábame co rabaño, así que penso que non me cobre estar mantendo o lobo. Entón, onte xa vendín catro. E se teño a quen, hei seguir vendendo".

As ovellas servíanlles aos seus donos como complemento á súa explotación de vacún.