Os lobos mataron oito ovellas no concello lugués de Xove.

Os animais estaban a pacer nunha leira pechada pero os lobos saltaron o valo e deixaron mortas todas as reses, agás o carneiro, que quedou ferido. Tres das ovellas estaban a piques de parir, polo que as perdas para o propietario foron considerables.

Os veciños amósanse sorprendidos de que o lobo actúe tan preto do mar e nunha zona de numerosas vivendas. Nas últimas semanas xa mataron outros exemplares de gando nesta parroquia de Camba, a escasos metros do polígono industrial.