O Goberno central reitera que Galicia, e o resto das comunidades que os reclaman, non van cobrar os cartos correspondentes á liquidación do IVE de 2017. Na conferencia de prensa posterior ao Consello de Ministros, a titular de Facenda insistiu en que o prazo para pagar esa débeda prescribiu e ademais, engadiu, ese diñeiro xa non existe. Son 2.500 millóns dos que 198 lle corresponderían a Galicia. María Jesús Montero fixo un chamento aos presidentes autonómicos que reclaman esa débeda para que deixen de utilizar expresións máis propias dos partidos independentistas.

María Jesús Montero, Ministra de Facenda "O Estado róubanos, España róubanos, expresións que soan a outras cuestións que foron reprochadas por parte das forzas políticas democráticas en relación coas bandeiras que algúns intentaron aupar para xustificar os fins independentistas, deberiamos ser medidos na linguaxe, utilizar as palabras oportunas e negar con absoluta rotundidade que haxa 2.500 millóns de euros que alguén vaia gastar e que non se traspasen ás comunidades autónomas"