O Boletín Oficial do Estado (BOE) publicou este luns a convocatoria das axudas do Goberno ao sector da pesca e acuicultura, por valor de 30 millóns de euros, para paliar a perdas económicas como consecuencia do coronavirus.

Trátase do real decreto do Ministerio de Agricultura, Pesca e Alimentación (MAPA), aprobado no último Consello de Ministros, con apoios para pescadores, armadores e organizacións de produtores da pesca e da acuicultura, co fin de compensar a paralización de actividade ou a baixada de facturación pola pandemia, a causa do peche da hostalería.

Entre 6.000 e 9.000 buques poderán optar ás axudas previstas no real decreto. A normativa inclúe, entre outras medidas, un incremento do limiar de axuda aos investimentos das organizacións de produtores de pesca e da acuicultura, do 3 % actual ao 12 %.

A axuda estará cofinanciada polo Fondo Europeo Marítimo e Pesqueiro (FEMP) nun 75 % e polo MAPA nun 25 %. O período que se tomará en conta para optar a este tipo de apoios está comprendido entre o 16 de marzo e o 15 de xullo de 2020.

Poderanse beneficiar tanto os armadores como os tripulantes cuxas empresas non presentasen un procedemento de suspensión de contratos ou cesamento de actividade.