Temos un tempo moi inestable porque estamos baixo a influencia de borrascas atlánticas que propician esta situación de inverno en plena primavera. Tanto é así que estamos tendo precipitacións en forma de neve nas montañas de Lugo e Ourense polo que foi preciso volver a acender as calefacións e a recuperar a roupa de abrigo.

Estas borrascas non só deixan mal tempo en terra. Na costa, mañá e pasado teremos que falar de avisos de temporal marítimo. O anticiclón devolverá a primavera a Galicia a partir do venres.

Frío e neve no Cebreiro

Os cumios máis altos da montaña de Lugo non entenden de estacións e aquí mestúrase a cor verde da primavera co manto branco do frío inverno. As temperaturas baixaron de golpe ata acadar valores negativos e con elas volveu a neve, pillando por sorpresa aos peregrinos.

Nevou con pouca intensidade e non deixou incidencias nas estradas. Con todo, a previsión de neve mantense para os vindeiros días en cotas de entre 1.000 e 1.300 metros de altitude.