O socialista Guillermo Meijón é o primeiro deputado dos 350 elixidos nas eleccións xerais do 10 de novembro que acudiu este luns ao Congreso para presentar as súas credenciais.

A Cámara Baixa abriu este luns as súas portas aos novos parlamentarios para que poidan entregar as credenciais expedidas polas Xuntas Electorais Provinciais que os acreditan como tales e así formalizar a súa incorporación á institución, que culminará na sesión constitutiva das Cortes do 3 de decembro.

O primeiro en facelo foi Guillermo Meijón, que minutos antes das dez da mañá xa se atopaba no Congreso para presentar a súa credencial como deputado por Pontevedra.

Meijón é membro da dirección socialista e foi deputado nas catro lexislaturas anteriores -a X, XI,  XII e XIII-.

O proceso implica unha serie de trámites, entre os que destacan as declaracións de bens e rendas que obrigatoriamente teñen que encher todos os deputados que ocuparán o hemiciclo na XIV lexislatura.

Tamén a fotografía oficial que logo figurará na web do Congreso, ou o teléfono móbil e a tableta electrónica á que tamén teñen dereito como ferramentas para facilitar o seu traballo parlamentario.