O paro aumentou en 11.000 persoas en Galicia no primeiro trimestre deste ano en comparación cos tres meses anteriores, ata un total de 156.800 desempregados, tras un incremento do 7,56 %, o dobre do crecemento en España (+3,79%).

Así, a taxa de paro en Galicia elévase ata o 12,65%, o que supón un incremento do 0,91%, segundo os datos da Enquisa de Poboación Activa (EPA) publicados este martes. Está por baixo do 14,4% que se rexistra en España. 

A crise provocada polo coronavirus supuxo a destrución de 13.000 empregos, e os ocupados caeron ata o 1.083.000.

A taxa de actividade en Galicia, é dicir, o cociente entre o total de activos e a poboación de máis de 16 anos, está no 53,01 %, coa provincia de Ourense, co 47,77 %, coa taxa máis baixa de España.