O Tribunal Constitucional rexeitou suspender preventivamente as condenas de 13 e 12 anos de prisión así como as inhabilitacións impostas ao exvicepresidente da Generalitat Oriol Junqueras e ao exconseller Raül Romeva polo proceso independentista de Cataluña.

Nun auto, o tribunal de garantías desestima a medida cautelar solicitada pola defensa dos condenados, que recorreu en amparo ao Constitucional para que anulase as condenas que lles impuxo o Supremo por sedición en concurso con malversación no 'procés'. Xa o fixo coa maioría dos condenados a penas de prisión nesta causa, aínda que a decisión respecto a Junqueras e Romeva postergouse dado que quedaban pendentes unhas solicitudes de recusación aos maxistrados, que foron rexeitadas o pasado mes de xuño.

Segundo a doutrina do tribunal, só se suspenden as condenas cando as penas de prisión son inferiores a cinco anos. E Junqueras foi condenado a 13 e Romeva a 12. Igualmente o tribunal rexeita suspender a inhabilitación non só polas altas condenas, senón tamén pola natureza dos delitos e a importancia dos cargos públicos que ostentaban ambos cando se cometeron os feitos no outono de 2017.