Hoxe hai Consello da Xunta extraordinario para aprobar os orzamentos do ano que vén. As contas públicas teñen un obxectivo claro, segundo o propio Goberno galego: impulsar a recuperación económica na fase final da pandemia. Inclúen a baixada de varios impostos: IRPF, actos xurídicos, patrimonio ou transmisións. 

Ao tempo, aumenta o gasto social, que levará sete de cada dez euros. Aí inclúese educación, coa gratuidade das escolas infantís, política social e sobre todo sanidade. Adiantouno o vicepresidente primeiro da Xunta Alfonso Rueda:  "Vai ter unha parte importantísima todo o que ten que ver coa sanidade pública. E despois tamén irán dirixidos a estimular a iniciativa privada, que ao final é o que fai funcionar a economía dun país e en Galicia queremos que siga sendo así".

Tamén aumentarán as transferencias aos concellos; achegaranse aos 500 millóns de euros.

Serán uns orzamentos expansivos. A previsión é que superen os 11.500 millóns, nun contexto de crecemento económico dun 6 %, tanto este ano coma o próximo.

A previsión é que os orzamentos entren no Parlamento este mércores, dentro dos prazos que marca a lei.