EFE

O Congreso dos Deputados aprobou este mércores de maneira definitiva a lei de prevención e loita contra a fraude fiscal, que inclúe medidas como a limitación dos pagos en efectivo a 1.000 euros ou a prohibición das amnistías fiscais.

Con esta lei, as persoas que reciban unha herdanza en vida e vendan algún dos bens antes de cinco anos terán que tributar máis no IRPF pola ganancia porque se modifica o cálculo do valor do ben recibido. Esta lei non terá carácter retroactivo, así que só afectará os pactos sucesorios constituídos tras a súa entrada en vigor, que será ao día seguinte da súa publicación no 'Boletín Oficial do Estado'.

O pleno do Congreso debateu e aprobou as emendas que introducira o Senado no texto, pero non a baixada do IVE dos salóns de peiteado -aprobada pola cámara alta pero despois anulada pola súa presidenta, Pilar Llop, que resultou ser un dos elementos máis polémicos da lei.

A lei estivo rodeada de polémica ata o punto de que dous partidos tentaron esta mañá paralizar o seu debate: o PP para esperar a que se resolva a súa reclamación sobre a anulación da baixada do IVE dos salóns de peiteado, algo rexeitado pola Mesa, e Coalición Canaria porque entende que a lei contravén o Réxime Económico e Fiscal (REF) de Canarias, aínda que o seu escrito chegou fóra de prazo, aclarou a presidenta do Congreso.

O Senado introduciu na lei unha emenda para baixar o imposto sobre o valor engadido IVE dos salóns de peiteado do 21 % ao 10 % co apoio de todos os grupos salvo o socialista, aínda que a votación foi anulada posteriormente por Llop, ao considerar que a emenda non era congruente coa proposta na que se baseaba, tal e como reclamaran tanto o Goberno como o PSOE.

O recurso a este inusual procedemento centrou boa parte do debate. Desde o PP, Javier Bas cualificou este movemento de "escándalo maiúsculo" e "burla democrática", xa que a baixada do IVE aplicábase a partir de 2022 e, por tanto, non afectaba o orzamento deste ano.
Vox asegurou que se produciu "un latrocinio lexislativo ao retirar unilateralmente unha emenda aprobada" mentres que ERC cargou contra o "vergoñoso espectáculo" do ataque á separación de poderes en forma de "cacicada" do Goberno.

"Utilizaron todos os medios á súa man, mesmo cousas que non se viron nunca", acusou Cidadáns, ao que PNV engadiu que se trata dunha anulación "extemporánea" que pon en cuestión a seguridade xurídica. Os cambios do Senado que si se votaron e aprobaron afectan o imposto de matriculacións, os pactos sucesorios, as obrigas dos notarios, as deducións fiscais para a produción cinematográfica en Canarias -que segundo Coalición Canaria non alcanzan a cumprir o REF-, o aumento do persoal da Axencia Tributaria ou a adaptación do texto á linguaxe inclusiva.

A lei de loita contra a fraude é unha normativa extensa que inclúe medidas como a prohibición das amnistías fiscais, a baixada de 2.500 a 1.000 euros da limitación dos pagos en efectivo a profesionais ou a rebaixa do limiar para entrar na lista de morosos dun millón a 600.000 euros.

A norma reforza o control das sociedades de investimento de capital variable (sicav), cuxos socios terán que ter unha participación mínima de 2.500 euros, e crea un gravame especial do 15 % sobre o beneficio non distribuído das socimis (sociedades anónimas cotizadas de investimento inmobiliario).

Entre os elementos máis polémicos da tramitación figura unha modificación do imposto de matriculación, que asumirá no que queda de ano os límites de emisións vixentes ata 2020, máis vantaxosos que os actuais.

Tamén xerou controversia a eliminación das vantaxes fiscais para os pactos sucesorios -que finalmente se manterán se os bens se venden máis de cinco anos despois de subscribilos- ou a elaboración dun valor de referencia dos inmobles sobre o que se calcularán os impostos de sucesións, transmisións patrimoniais e patrimonio.