Coa axuda de material didáctico, o alumnado do Colexio do Foxo, na Estrada, amplía os seus coñecementos sobre as distintas especies de peixes e mariscos, e o seu hábitat.

Noa López Oca, alumna de 5º curso do CEIP do Foxo, asegura que "estivemos aprendendo onde viven por exemplo as sardiñas, o polbo ou os mexilóns. O peixe a verdade é que si que me gusta e isto axúdame a saber o traballo que lle leva aos pescadores e as marisqueiras para collelo".

Moi preto, outro grupo está aprendendo agora a distinguir entre as distintas especies de bivalvos, e descubrindo de paso os seus pratos favoritos.

Nora Diéguez López, alumna de 4º de educación primaria do CEIP do Foxo, confesa que "a ameixa é o meu molusco preferido". Estes obradoiros forman parte dunha campaña da Consellería do Mar. O obxectivo é que os nenos e nenas coñezan de preto as distintas especies mariñas e as súas propiedades nutricionais. A meta final é aumentar o consumo destes alimentos.

Natalia Pena Couceiro, mestra do CEIP do Foxo explica que "fixemos un día á semana de bocata en conserva. É o luns, levamos un rexistro e si que hai moitos nenos que están traendo  nos almorzos bocatas de sardiñas, de mexillóns, de cabala, de atún". "Ti si que es un bo peixe" forma parte do programa "Aliméntate ben", da administración autonómica, dirixido a máis de 150.000 escolares.