A operación retorno deixa boas noticias en Galicia. Dende o pasado venres non houbo ningunha vítima mortal nas nosas estradas. Este ano o nivel de tráfico baixou un 13% con respecto ás mesmas datas do ano pasado. A operación non remata ata as doce desta noite. Tráfico anima os condutores a manter o mesmo nivel de alerta e vixilancia nas vindeiras horas. Dende a Delegación do Goberno insisten na importancia de controlar a velocidade e de non consumir drogas ou alcol cando se vai conducir. No que vai de ano houbo 37 falecidos nas estradas galegas, 26 menos ca nas mesmas datas do ano pasado.