Cociñar como o facían as nosas avoas. Amodo, sen présa, é a filosofia que traslada Joan Roca, tres estrelas Michelin, que neste Madrid Fusión reinventa a súa técnica de cociña ao baleiro. Agora introduce técnicas combinadas, vapor e alta presión para o peixe, madeira e electricidade para a carne.

A elite que representa Roca, soña con chegar a Adrián Espiño. É un alumno do Instituto Sanxillao, de Lugo. E é un dos catro finalistas do concurso que vai elixir o mellor pinche.

Con Adrián está Julio, o seu profesor, e Lucía Freitas. A ela elixiuna Adrián para completar a súa formación unha vez que soubo que era un dos finalistas do concurso. Freitas exerce de cociñeiro asociado, un apoio fundamental para afrontar a proba final. E vaino facer cunha receita baseada na costela de vitela coa que pretende converterse no mellor pinche.