Axentes da Policía Local de Lugo denunciaron cinco persoas que viaxaban en coche pola cidade sen levar a máscara de protección, que é obrigatoria se no vehículo van persoas que non conviven baixo o mesmo teito.

Segundo informou a Policía Local, axentes da Unidade Territorial de Policía de Barrio estableceron onte varios filtros de seguridade na cidade para velar polo cumprimento das medidas decretadas polo Goberno para executar o proceso de desescalada do estado de alarma.

Neses filtros, os axentes levantaron cinco actas por infraccións da Lei de Protección da Seguridade Cidadá, ao comprobar que cinco ocupantes de vehículos viaxaban sen utilizar a máscara de protección, a pesar de que non convivían no mesmo domicilio.

Ademais, neses controis, co apoio dun vehículo policial equipado cun radar, os axentes cursaron 11 denuncias a outros tantos condutores por exceder o límite de velocidade.