En Campo Lameiro, un home de 59 anos morreu este mediodía mentres traballaba na corta de eucaliptos. O falecido é un dos donos dunha empresa madeireira da zona. No momento do accidente, o home estaba no mato traballando con outros empregados. Ao parecer, un eucalipto de grandes dimensións bateu contra el cando caía. O home faleceu no mesmo lugar.

Jesús Ferrón morreu cortando un dos eucaliptos máis grandes dos que quedaban en pé neste mato de Campo Lameiro. Segundo as testemuñas, a árbore bateu contra el na caída.

"Eu o que sei é que un eucalipto debeu esvarar e deulle no peito e afundiullo", comenta Carlos Costa, alcalde de Campo Lameiro.

"A min díxome o traballador que estaba con el que viu vir o pau, que apartou e esvarou e o pau golpeouno e quedou no sitio. O pau non o esmagou, bateuno polo aire", di Antonio Barros, compadre do falecido.

O falecido tiña 59 anos e levaba dende os 14 cortando madeira na empresa familiar. Dende que faleceu o pai, rexentaba a empresa xunto cun irmán. Todos os que o coñecen din que era bo traballador e moi experimentado.

"Se alguén tiña experiencia era esta familia, xa o pai era madeireiro e traballaba para o pai toda a vida", di o alcalde.

"Eu teño estado con el e velo cortar en sitios máis perigosos ca este e dicir el que a árbore cae para aí e a árbore caía para onde dicía el sempre", lembra o compadre do falecido. 

Esta morte deixa unha gran consternación en Campo Lameiro e en especial na aldea de Praderrei, de onde era natural o falecido.