Un operario faleceu este venres despois de envorcar o camión que manexaba no interior dunha nave do polígono industrial das Gándaras, no Porriño, segundo informaron fontes do 112 Galicia.

#AXEGAInforma do falecemento dun traballador que quedou atrapado polo camión que manexaba no Polígono das Gándaras, O Porriño. Para liberar á vítima, pediuse a colaboración dos #BombeirosPorriño e, ademais, solicitouse a intervención de Urxencias Sanitarias-061 e Garda Civil pic.twitter.com/jmUBNsSU0n

— 112Galicia (@112Galicia) November 22, 2019

O suceso produciuse minutos antes das 9.00 horas, tal e como indicaron as persoas que contactaron co centro de atención ás emerxencias para pedir axuda urxente.

Os bombeiros do Baixo Miño liberaron a vítima, que quedara atrapada baixo o camión cargado con material pesado, pero nada se puido facer por salvarlle a vida.

Tamén foron avisados efectivos de Urxencias Médicas e a Garda Civil, que trata de coñecer os detalles deste suceso.