Milleiros de persoas saíron ás rúas este sábado na Arxentina en rexeitamento do escándalo de nepotismo no acceso ás vacinas contra a covid coñecido a semana pasada. A situación levou á dimisión do ministro de Saúde. En Bos Aires a concentración realizouse na praza de Maio ante a Casa Rosada, sede da presidencia do país, e houbo manifestacións en distintas provincias como Mendoza, Córdoba e Santa Fé e en cidades como Rosario, La Plata e Mar del Plata, entre outras.

A xa denominada "vacinación VIP" aféctalle a todo o Goberno. Na capital houbo enfrontamentos entre manifestantes de distintas seccións políticas e sindicais que participaban na marcha.

A convocatoria realizouse por redes sociais e denominouse #27F. Algúns xornais relacionan o expresidente Mauricio Macri coa protesta. Os manifestantes berraron lemas esixindo a dimisión do Goberno. O presidente Alberto Fernández criticou os participantes que exhibiron bolsas mortuorias con nomes de dirixentes políticos e bolsas de lixo.