Unhas corenta persoas buscan sen descanso desde o pasado domingo pola noite a muller de 69 anos que desapareceu na parroquia de Fazouro, no municipio lucense de Foz.

O alcalde da localidade, Fran Cajoto, confirmou a EFE que á primeira hora da mañá deste martes a unidade canina chegada desde Ourense púxose de novo a traballar para que os cans adestrados busquen un rastro que permita dar coa persoa desaparecida.

Onte sumáronse á procura os guías caninos e un helicóptero, pero os labores de rastrexo foron infrutuosas, a pesar de que foron peiteados "camiños, leiras e monte" na zona do Raxal, en Fazouro, precisou o rexedor local.

"Os rastros é moi complicado que poidan existir. Entón o que facemos é traballar cos cans que nos permiten saber se a persoa está por diante de nós, xa que poden localizar ese olor xenérico que poida estar aí", di Alejandro Barreiro, de Salvamento de Galicia.

No dispositivo de procura están a participar efectivos de Protección Civil, membros do GES de Cervo, axentes da Garda Civil e da Policía Local, veciños da sexaxenaria e persoal do Concello de Foz, "arredor de corenta persoas", precisou Cajoto.

A muller desaparecida padece alzhéimer nun estado avanzado, segundo informaron fontes da Garda Civil, e faltou do seu domicilio noutras ocasións, aínda que regresou ao mesmo polos seus propios medios.