Ás portas da Facultade de Dereito todo son nervios. Aquí se celebran as probas de acceso ás 77 prazas de formación convocadas na especialidade de enfermaría. É o grupo máis numeroso cun milleiro de aspirantes.

Na rama de Farmacia convocáronse oito prazas e na de Psicoloxía sete. Hai máis de 300 persoas admitidas en ambos os dous grupos pero nos minutos previos ao exame ninguén quere falar de probabilidades.

No apartado de Medicina, o coñecido exame MIR, as probabilidades aumentan. Son 359 prazas polas que disputan algo menos de 600 persoas.

O maior número de prazas MIR son para formación en medicina familiar e comunitaria pero a maioría de aspirantes prefire abrir o abano de preferencias.

Tamén se ofertan seis prazas para formación en Bioloxía, Física e Química. O obxectivo: seguir aprendendo cunha mínima estabilidade laboral que se pode prolongar entre dous e cinco anos.