Un novo foco de emisión súmase ás dúas bocas que se abriran na madrugada do venres. Hai xa seis focos emisores de lava nestes momentos, e non se descarta que poidan producirse máis que emitan material volcánico. 

Nas últimas 24 horas houbo 21 sismos na illa da Palma, segundo confirma o Instituto Xeolóxico Nacional. Estes sismos, algún deles perceptibles pola poboación, puideron ser a causa da apertura dunha terceira boca no volcán de Cumbre Vieja.

A lava que sae polo terceiro cono é moito máis líquida, polo que corre máis rápido en dirección ao mar e xa se uniu esta tarde ás coadas de días anteriores. O persoal científico que monitoriza a actividade volcánica na Palma pensa que esta situación vai durar bastante tempo.

A lava que está chegando á costa xa penetrou no mar case cincocentos metros, co que incrementou a superficie da illa en case 28 hectáreas. Os investigadores do buque Ramón Margalef din que a lava pode penetrar no mar ata 800 metros de profundidade, ata un lugar onde o fondo mariño cae bruscamente.

Pedro Sánchez volve á illa

Este sábado visitou a zona o ministro da Presidencia, Feliz Bolaños. Hoxe, o presidente do Goberno, Pedro Sánchez, volverá á illa para coñecer as prioridades e as propostas dos municipios afectados, do Cabido e do Executivo rexional.

Bolaños lembrou que o Consello de Ministros acordou destinar 10,5 millóns de euros á Palma e asegurou que nos próximos días os cartos estarán ao dispor das autoridades para a compra de vivendas.