Son as últimas horas de uso obrigatorio das máscaras no exterior, unha medida que se recibe cunha mestura de alivio, pero tamén con certa preocupación, sobre todo entre a xente de maior idade.

As máscaras poderán retirarse ao aire libre sempre e cando se manteña unha distancia de metro e medio entre non conviventes. Tamén en actos co público sentado mantendo a distancia de seguridade.

Seguirán sendo obrigatorias en eventos multitudinarios ao aire libre, cando os asistentes estean de pé. Nas terrazas tamén haberá que levalas se non se mantén a distancia.

En calquera caso, haberá que tela sempre á man para cando entremos en espazos pechados.

Os residentes dos centros de maiores tamén poderán retiralas sempre e cando estean vacinados o 80 por cento dos usuarios.

O 1 de xullo darase outro paso cara á normalidade coa apertura dos locais de lecer nocturno. A ocupación quedará reducida á metade no interior. Poderase bailar, pero sempre con máscara e sen achegarse aos demais.