Un veciño de Sistallo, en Cospeito, apareceu morto na súa casa, no lugar da Cal. Tras varias semanas sen ter noticias del, uns coñecidos decidiron denunciar a súa desaparición. Daquela, a Garda Civil acudiu ao domicilio, onde os axentes atoparon o seu cadáver boca abaixo, atrapado no piso de madeira que separa as dúas plantas do inmoble.

Veciños: "Cando subiu a Garda Civil polas escaleiras, apareceu. Rompeu unha táboa e quedou co metido e coa cabeza para abaixo. O pé tíñao dobrado. Estaba colgado coa cabeza para abaixo".

"Nós había quince días que non o viamos. A xente viña buscalo para traballar. Daquela chamamos a Garda Civil para avisar que estaba desaparecido. Entón viñeron e atopámolo na casa. Xa estaba morto".

"Había quince días que non o viamos. E ás casas onde ía traballar non ía. Por iso nós tivemos esa sospeita: aquí algo pasa. Entón foi cando chamamos a Garda Civil".

A casa onde residía o falecido encontrábase en estado ruinoso. Tiña o lousado roto e o piso de madeira onde quedou atrapado non era seguro. Para liberar o corpo, foi precisa a intervención dos bombeiros de Vilalba.

"O piso está todo vello. Xa non había por onde andar. As táboas están todas vellas e rotas. Ao ir andando, debeu de irse a táboa para abaixo ao poñer o pé. Iso está perdido".
"Estaba a casa moi deteriorada, moi mal".

A Garda Civil investiga agora as circunstancias do suceso. Pola súa parte, o corpo do falecido foi trasladado a Lugo para practicarlle a autopsia.