Ambiente case prebélico o que se respira nos arredores da praza da Picota intres antes de que comece a batalla de farrapos enlamados. Cómpre protexerse e protexer ben as ferramentas de traballo. E sen anuncio previo comeza a batalla. Unha catarse á que se entregan propios e estraños sen respecto ningún. Mozos, vellos e nenos, a farrapada do luns borralleiro de Laza non ten límites para o desbarre.

Este é só o comezo, a vaca Morena e as formigas agardan a entrar na praza pola tarde para pechar o día máis grande do Entroido máis anárquico.