Aos seus 85 anos, don José María leva repetido este ritual case mil cincocentas veces. Caeu na conta de que o podía facer cando, de mozo, viu traballar outro zahorí buscando auga con este sistema ancestral.

Non lle acordou o conto ata que moitos anos despois precisou indicarlles aos poceiros onde furar para facer o pozo da reitoral dunha das parroquias que tivo ao seu cargo.

Empezou a facelo só coa variña de salgueiro verde que lle permite localizar as correntes de auga, pero co tempo foi estudando a maneira de traballar con máis precisón e engadiu o péndulo que lle axuda a dar co punto de máximo caudal. E logo emprega uns imáns e un cable para fixar a fondura. Este ano localizou dezaseis novos mananciais coa mesma precisión de sempre.

Pensa seguir así mentres a saúde llo permita, porque considera que este é un servizo máis que debe prestar desinteresadamente á comunidade. E tamén está disposto a ensinarlle o que sabe a calquera que teña a sensibilidade precisa para poder facelo.