Javier Touza, presidente da Cooperativa de Armadores de Vigo, falou este luns no Bos días sobre as consecuencias do acordo do brexit no sector pesqueiro, que reciben con "tristura e preocupación".

Touza explicou a importancia que ten o sector, que "durante a pandemia as nosas frotas non pararon de pescar. Durante este ano só no porto de Vigo movéronse máis de trinta mil toneladas de peixe fresco e de cincocentas mil de peixe conxelado". Nese sentido, dixo que o acordo no reflicte nin esa importancia nin as promesas que se lle fixo: "A nós dixósenos que na declaración política do brexit a pesca ía ser un sector esencial da negociación e que as partes poñerían os mellores esforzos para lograr un acordo antes do 1 de xullo de 2020. Ao final do día fomos o último sector obxecto de negociación e chove sobre mollado, sabemos que somos moeda de cambio".

A palabra que define a situación actual é a de "incerteza". "Sabemos que era moi importante ter un acordo comercial polo brexit. Estamos contentos polos sectores comerciais galegos que van poder contar con estabilidade", di o representante dos armadores vigueses. "Pero no sector da pesca fomos os grandes prexudicados".

Partindo desa incerteza, o que o sector o quere é solucións e concrecións: "Agora establécese un período de axuste de cinco anos en que imos ter unhas reducións, en principio, non moi significativas. Pero, como di a conselleira, hai que coñecer a letra pequena. O importante é que saibamos que vai afectar todas as frotas, tanto de litoral como a do Cantábrico, as que temos a pescar no Gran Sol e nas augas en que temos que stocks compartidos co Reino Unido", di Javier Touza.

Respecto a ese período de cinco anos de transición, Touza di: "Non sei se son suficientes, pero son os que temos. O que está claro é que o ministro de Agricultura e Pesca dixo que o acordo dá seguridade xurídica á frota. Eu pregúntome: cando unha persoa vai mercar unha casa ou un piso, non pide unha hipoteca a cinco anos. Como imos afrontar fortes investimentos en renovación da frota sabendo que dentro de cinco anos imos entrar no bombo da lotaría de Nadal e ano a ano se irán fixando as cotas para os stocks compartidos que temos co Reino Unido? Non nos dá ningunha seguridade a medio e longo prazo".

Confían, iso si, en que como recolle o acordo, os efectos só se apliquen nas augas das illas do Reino Unido: "Desde logo estamos a estudar este acordo, pero en principio non se vai aplicar aos territorios de ultramar que dependen do Reino Unido. En calquera caso o impacto, a efectos de aranceis, vanse reflexar a partir do 1 de xaneiro, é dicir en tres días".

Sobre a posibilidade de explorar outros espazos de pesca, Touza dixo que "aínda é pronto para establecer estratexias. Para nós é importante saber que imos da man da Xunta de Galicia. Existen distintas opcións e nós imos loitar para defender a nosa frota, a rendibilidade e os postos de traballo, buscando a máxima competitividade nun escenario globalizado".