O presidente de Aragón, Javier Lambán, deu positivo en coronavirus e permanecerá illado no seu domicilio durante os próximos dez días, tal e como establece o protocolo sanitario.

Segundo informan fontes do Goberno aragonés, Lambán atópase ben, sen apenas síntomas, e suspendeu a súa axenda oficial da próxima semana.

O presidente, que participaba no 40º Congreso Federal do PSOE en Valencia, tivo este sábado á noite unhas décimas de febre, polo que acudiu a un hospital da cidade. Tras facer unha PCR, decidiu non ir ao acto central do conclave e volver a Ejea de los Caballeros (Zaragoza), onde vive.    

O presidente está vacinado coas dúas doses e todos os contactos estreitos xa están avisados para tomar as medidas correspondentes.