O conselleiro de Sanidade, Julio García Comesaña, confirmou que se están facendo "unha serie de probas" para determinar se hai "causa-efecto" no caso da muller de 63 anos de idade ingresada en Vigo tras sufrir un trombo despois de ser vacinada fronte á covid-19 con AstraZeneca, quen está evolucionando "favorablemente".   

En conferencia de prensa este mércores, García Comesaña indicou que aínda "é pronto para facer unha valoración", aínda que remarcou que o caso foi trasladado a Farmacovixilancia da Axencia Española do Medicamento e estase "seguindo o protocolo" para tratar de "afinar máis se hai unha relación causa-efecto ou é circunstancial". 

Neste sentido, comunicou que non se refugou de momento ningunha das dúas posibilidades. Ademais, ao ser cuestionado acerca de se hai máis casos como este en investigación, recoñeceu que Farmacovixilancia investiga "situacións de todo tipo, desde leves ata máis complexas".   

Así, manifestou que "cada día prodúcense varias situacións en toda a rede de vacinación", aínda que asegurou que o desta muller é "o único caso no que se está estudando causa-efecto" e que "hai que confirmar".   

Segundo fontes consultadas por Europa Press, a muller de 63 anos, que se atopaba sa, ingresou o pasado mércores no Hospital Álvaro Cunqueiro de Vigo tras sufrir unha baixada repentina de plaquetas despois de recibir a vacina de  AstraZeneca. Aínda que se apuntou inicialmente a un hematoma suprarrenal, este luns confirmáronlle á paciente que sufrira un trombo.