O Ministerio do Interior recoñece que cesou ao coronel da Garda Civil Diego Pérez dos Cobos por unha perda de confianza ao non comunicar as actuacións da investigación do 8-M, pero en ningún caso polo contido do informe, ao que non tiveron acceso nin o departamento nin a dirección do corpo.

Así responderon fontes do Ministerio á información que este martes publica El confidencial, que inclúe un oficio asinado pola directora do instituto armado, María Gámez, co selo de "Reservado", onde se sinala que o ex-xefe da Comandancia de Madrid foi cesado "por perda de confianza desta dirección xeral e do Equipo de Dirección do Ministerio do Interior, por non informar do desenvolvemento de investigacións e actuacións da Garda Civil, no marco operativo e de Policía Xudicial, con fins de coñecemento".

As fontes subliñan que a destitución se enmarca "no proceso de remodelación da Garda Civil e concrétase, como se explicita na proposta de cesamento, por unha perda de confianza derivada, entre outros, porque se incumpriu o procedemento de comunicación de actuacións, aos sós efectos de coñecemento, non do contido das mesmas, que se debe á dirección da Garda Civil a través da cadea de mando".

Engaden que a dirección da Garda Civil e o Ministerio do Interior "nin coñecían as actuacións, nin tiveron acceso ao informe", que, "con todo, foi obxecto de filtracións antes mesmo de que as partes personadas no proceso tivesen acceso ao mesmo".

Interior precisa que a confianza "é un elemento nuclear nun cargo como o que ocupaba o coronel, para o que foi nomeado de forma discrecional, e que para o que se necesitan as máis altas cotas de neutralidade, profesionalidade e comunicación".

"Sen estes elementos, non se pode desenvolver o traballo diario de forma óptima", conclúen as fontes.

A oposición pide a dimisión de Marlaska

O PP, Vox e Cidadáns coincidiron en reclamar este martes, a través de Twitter, a dimisión inmediata do ministro do Interior, Fernando Grande-Marlaska, ao que acusan de "mentir" sobre a destitución.

O presidente do PP, Pablo Casado, esixiu o "cesamento inmediato" de Marlaska porque considera "gravísimo" o seu comportamento. "O Goberno confesa que cesou un coronel da Garda Civil por non filtrar a investigación do 8-M e cumprir unha instrución xudicial", di.

O secretario xeral do partido, Teodoro García Egea, asegurou que Marlaska "mentiu en sede parlamentaria e en rolda de prensa" ao dar as explicacións por este cesamento.

O presidente de Vox, Santiago Abascal, limitouse a poñer en Twitter a palabra "Delincuentes!", xunto a unha foto do documento publicado hoxe. A secretaria xeral do partido, Macarena Olona, advirte que "nunca fagas unha pregunta cuxa resposta non saibas de antemán" e conclúe: "Agora xa sabedes todos por que non me contestou o indigno ministro Marlaska", ao que augura que "caerá polos seus subordinados".

Pola súa banda, o portavoz de C's, Edmundo  Bal, asegura que a información "proba que Marlaska mentiu aos españois e efectivamente o coronel Pérez dos  Cobos foi cesado por negarse a cumprir unha orde ilegal", algo que "é inadmisible". Engade que "o ministro do Interior non pode continuar nin un minuto máis no seu posto".