O Goberno británico ponse en mans do que bautizou como "regra de seis", a prohibición de reunións de máis de seis persoas, para tratar de impedir que as preocupantes cifras de contaxios da COVID-19 se convertan nunha segunda onda. O primeiro ministro británico, Boris Johnson, compareceu este mércores escoltado polos seus principais asesores médicos para confirmar que as autoridades recorrerán á man dura e que se creará a figura de "gardas COVID" para perseguir os infractores.

Aqueles que non respecten a norma, advertiu o xefe de Goberno, expóñense a ser dispersados pola policía, multados ou mesmo arrestados. "Non é un novo confinamento", repetiu reiteradamente Johnson ante as preguntas dos xornalistas. Non o é, pero desde logo supón un revés para a estratexia do seu Executivo, que pasaba por non adoptar grandes medidas a escala nacional e concentrar os esforzos en atallar os brotes localmente.

O incremento de novos casos que se rexistrou nos últimos días acendeu as alarmas en Downing Street, o Goberno non quere que se repita o escenario da primavera, cando a demora en adoptar medidas fixo do país un dos máis castigados de Europa pola pandemia.