EFE

A Fiscalía filipina imputou polos supostos delitos de asasinato, falsificación de probas e perxurio aos tres policías que presuntamente participaron na morte do coruñés Diego Bello en xaneiro de 2020 na illa de Siargao.

Así o comunicou a Plataforma 'Xustiza para Diego', que indica que esta noticia foi comunicada pola xustiza filipina ao consulado español en Filipinas.

O adxunto ao fiscal xeneral filipino Arnold L. Magpantay, explicou o colectivo, recoñece que hai "serios indicios" de que os policías cometeron estes delitos que acabaron coa vida de Diego Bello. "Só nos queda esperar que o proceso xudicial que agora se inicia leve a cabo con todas as garantías legais e que os acusados respondan no seu caso os delitos cometidos", sostiveron desde a plataforma de amigos e familiares.

Así mesmo, apuntaron que o consulado español en Filipinas recomendou á familia que compareza na causa, o que farán nos próximos días.

Os familiares e amigos denunciaron desde o primeiro momento que a operación que acabou coa vida do surfeiro de 32 anos foi "un asasinato a sangue frío".