Boa parte do incremento de casos na área sanitaria de Ferrol ten que ver cos positivos nas residencias de maiores de Pontedeume. O municipio, que mantén o nivel máximo de alerta ante a incidencia do virus, detectou casos nos dous centros de maiores da vila. O que máis preocupa é o da residencia da Nosa Señora das Virtudes.

É importante o aumento neste centro nas últimas 24 horas, onde se pasou de ter un usuario afectado onte a 23 novos positivos entre os maiores este domingo. Tamén se incrementa o número de traballadores que deron positivo nas probas, oito máis, co que xa serían 11 os infectados.

A cifra total ascendería neste momento a 35 entre usuarios e persoal do centro. Pero é que tamén aumentan os contaxios na outra residencia de maiores deste concello de Pontedeume, a das Fragas. Había onte un único traballador positivo, e xa son hoxe cinco os usuarios contaxiados e outro empregado máis.

Este domingo de Todos os Santos deixa un incremento dos contaxios nos centros de maiores galegos: máis de setenta novos positivos entre usuarios e persoal.