As dependencias do colectivo social Carabelo acollen un curso de alfabetización das linguas oficiais en Galicia para persoas inmigrantes, organizado polo Concello de Lalín. O obxectivo é integrar persoas que teñen problemas co idioma. Estes cursos prolongaranse ata o 30 de outubro. 

Son grupos reducidos de menos de dez alumons e alumnas. En total preto de medio cento de persoas acoden aquí en quendas, entre as nove e media da mañá e ata as oito do serán. Cada un dos catro grupos asiste a sesións de dúas horas. Os cursos van dende o máis elemental para coñecer as primeiras palabras ata os que xa están máis avanzados.

"É un goteo de xente que busca, que necesita axuda, uns orientación e outros apoio como este tipo que a través do Fondo Social Europeo pódese conseguir. E axúdaselles tanto informativamente, apoio escolar, apoio tanto para eles como para os fillos. Temos claro que, si é certo que este curso é para as persoas con problemas ou risco de exclusión, pero xa a nivel da asociación pois abranque moito máis. Xa son todas as familias non só as estranxeiras, senón tamén as españolas", di Luisa Salas, voluntaria da Asociación Carabelo.

"Para mellorar o meu castelán e para que me axuden. Porque porque exemplo eu teño problema para escribir e expresarme. Entón por iso me axuda", conta unha das alumnas. "Necesitaba e necesito falar mellor, porque teño que mellorar porque faime falla ter un traballo. Non agora, que non poido traballar que teño o home enfermo, pero no futuro sí. E para mellorar é necesario que veña as clases, entón decidín vir as clases malia que xa levo oito anos aquí", explica outra.

Con este trato case persoalizado os idiomas galego e castelán serven como medio para a inclusión e favorecen a interacción dinámica coa sociedade. O persoal docente conta con ampla experiencia no ensino a migrantes.