A Policía Nacional detivo 60 membros dunha organización criminal asentada en Mallorca dedicada ao branqueo de cartos procedente do narcotráfico. Os acusados utilizaban un entramado empresarial para desviar os beneficios da droga a Cuba, República Dominicana e os Estados Unidos. Os axentes calculan que a rede lavou máis dun millón de euros nun ano.

Dúas empresas mallorquinas participaban no entramado. Na operación aprehendéronse máis de tres quilos de cocaína, 60 de substancias de corte e uns 400.000 euros en efectivo. As investigacións permitiron descubrir que os beneficios da venda da cocaína os desviaban a outros países con diferentes métodos.

Principalmente realizaban transferencias bancarias internacionais con contas a nomes de testaferros e envío de cartos desde locutorios. Usaban identidades de persoas interpostas e con pequenas cantidades a cambio de comisións.

En España o líder da organización usaba a identidade de anciáns para crear empresas pantasma sen actividade, que lle permitían simular que os membros da rede traballaban no sector da construción.