Galicia presentará tres proxectos biotecnolóxicos por 445 millóns de euros á convocatoria para captar fondos europeos Next Generation de reactivación.

Así o avanzou o presidente da Xunta, Alberto Núñez Feijóo, antes dunha reunión con empresas deste sector en que tamén participaron o vicepresidente segundo, Francisco Conde, e o conselleiro de Sanidade, Julio García Comesaña.

Durante a súa intervención, Núñez Feijóo destacou a importancia deste sector en Galicia, xa consolidado e en continua expansión, que traballa en proxectos útiles para o futuro, tanto a busca de fármacos e vacinas contra a covid, aínda que non só, como na loita contra o cambio climático, a seguridade alimentaria e a agricultura sostible, entre outros.

Os tres proxectos que optan a ser seleccionados para recibir fondos europeos están liderados pola empresa Zendal, a Fundación Kaertor e por Estrella Galicia.

O proxecto do Grupo Zendal, con sede no Porriño, está cuantificado en 111 millóns de euros e está orientado ao incremento de produción e distribución mundial de vacinas.

Trátase da única empresa en España con capacidade suficiente para producir vacinas ao ritmo e demanda requiridos e a súa proposta consiste na construción de dúas novas plantas para poder producir ata 800 millóns de vacinas anuais.

O segundo proxecto lidérao a Fundación Kaertor e persegue desenvolver fármacos en estado  preclínico e avanzados, así como o impulso á compra pública.

Nesta proposta participan sete comunidades autónomas, lideradas por Galicia, e os investimentos nesta comunidade supoñerían 78,5 millóns en oito actuacións. Non é un proxecto ex novo, senón que dá continuidade ao traballo desenvolvido na aceleradora desta fundación.

E o terceiro proxecto, liderado por Estrella Galicia, está vinculado á procura de novas solucións alimentarias, sinalou o presidente da Xunta, que indicou que o investimento chega aos 256 millóns de euros.

"Estas son as credenciais de Galicia para competir, en enfrontamento limpo, polos fondos. Non nos asusta a competencia, queremos concorrencia competitiva", dixo Núñez Feijóo, que pediu ao Goberno "transparencia" na elaboración do regulamento para poder optar aos fondos europeos de reactivación, porque "non se trata de favorecer os gobernos (autonómicos), senón a ciencia".

Por este motivo, confiou en que os proxectos presentados por Galicia, 108 ata a data, por un valor de 9.400 millóns de euros, teñan unha "resposta obxectiva, rigorosa e profesional" por parte do Goberno.

Ademais, segundo Núñez Feijóo, "os grandes países" da Unión Europea "non van permitir que (os 750.000 millóns de euros do fondo) sexan investidos en balde, senón que esixirán cambios relevantes para que esa cantidade inxente de recursos produza cambios".

"Non se trata só de recuperar a perda de riqueza producida pola pandemia, nin os empregos perdidos, senón de reconstruír un novo modelo económico, unha nova forma de vivir", incidiu Núñez Feijóo, que insistiu en que a distribución de fondos debe primar "os mellores proxectos" presentados por empresas, entidades e administracións públicas, xa que son o sustento para facer "unha economía moderna, sostible e resiliente".