O Goberno galego decretou a situación de emerxencia sanitaria na Comunidade e ordenou o peche, a partir deste sábado, de todos os establecementos menos os comercios de alimentación e farmacias para evitar a propagación do coronavirus. Segundo explicou o presidente da Xunta, Alberto Núñez Feijóo, tras presidir unha reunión extraordinaria do seu Goberno, cafeterías, bares, restaurantes e os albergues do Camiño de Santiago permanecerán pechados ao público durante o próximos catorce días, pero os primeiros poderán seguir prestando servizos de entrega a domicilio ou para a súa recollida no local e consumo a domicilio.

Tampouco están afectados por esta medida os servizos de restauración dos hoteis, sempre que só sirvan para clientes, e os establecementos de instalacións de servizos públicos. "Vai ser así durante catorce días", en todo caso o Goberno galego ábrese a reducir este prazo se o nivel de contaxio remite, pero tampouco descarta ampliar ditas restricións en función do avance da enfermidade e das recomendacións sanitarias. "Facémolo polo ben de todos" para conter a propagación do coronavirus, dixo Núñez Feijóo nunha conferencia de prensa facilitada aos medios de comunicación por streaming na que lembrou que "quen teña síntomas está obrigado a quedarse na casa" pero "quen non os teña é recomendable que o faga tamén" a pesar de que polo momento non se tomaron medidas de "confinamento obrigatorio".

Segundo informou o presidente, Alberto Núñez Feijóo, fíxase un aforamento máximo para os tanatorios dun terzo da súa capacidade. Así mesmo, queda establecido un número máximo de 25 persoas para o acompañamento do cortexo fúnebre. 

O Goberno galego adoptou esta decisión nunha reunión extraordinaria co obxectivo de superar a crise "á maior prontitude posible" porque a pandemia que padecemos ataca a "organismos físicos" pero ataca tamén ao "conxunto da sociedade" polo que é precisa a "unidade" de todos os cidadáns pois é o que "nos capacita para dar unha resposta idónea". O presidente da Xunta pediu á galegos "serenidade, firmeza e disciplina" para cumprir estas normas ás que esixiu tamén que se somen os residentes doutras rexións que nos últimos días chegaron á comunidade e entenderon a corentena como unhas "vacacións", reprochou.

A este fío, Núñez Feijóo sostivo que na loita contra esta enfermidade "cada un temos un papel e debemos cumprilo" porque a pesar de que "todos temos temores, ningún cidadán debería sentirse só nesta crise". Para xestionar todas estas medidas Galicia constituirá en Galicia un centro de coordinación de emerxencia presidido polo propio Núñez Feijóo e no que estarán o vicepresidente, Alfonso Rueda; o conselleiro de Sanidade, Jesús Vázquez Almuiña, a Delegación do Goberno en Galicia e representantes tanto da Garda Civil como da Policía.

A declaración, explicou, podería implicar a reorganización funcional dos servizos administrativos e as modificacións necesarias precisas para afrontar a emerxencia. Ademais, aclarou, o estado de alarma "conleva, por suposto" a asunción da tutela de "todos os establecementos sanitarios", tamén os privados. "A coordinación de todos os establecementos sanitarios privados ou concertados en Galicia asúmea a autoridade sanitaria e neste caso o centro de coordinación que acabamos de constituír", subliñou.