Galicia é a terceira comunidade autónoma na que máis se reduciu a taxa anual do Índice de Produción Industrial, un -4,3 %, só superada por Estremadura, -17,9 %, e Principado de Asturias, -11,9 %.

Segundo as cifras do Instituto Nacional de estatística (INE), a taxa anual da produción industrial aumenta respecto a outubro de 2018 en sete comunidades autónomas e diminúe nas outras dez.

Os maiores incrementos prodúcense en Comunidade Foral de Navarra (26,4 %), A Rioxa (13,8 %) e Región de Murcia (6,9 %).

No conxunto do Estado, con cifras referidas ao último mes de outubro, a variación mensual do Índice de Produción Industrial é do -0,4 %, se se eliminan os efectos estacionais e de calendario. Esta taxa é 0,4 puntos superior á observada en setembro.

A taxa anual do Índice de Produción Industrial sitúase no -1,3% na serie corrixida de efectos estacionais e de calendario, e no 1,1% na serie orixinal.

Por sectores, Bens de Equipo (1,2 %) e Bens de Consumo non Duradeiro (0,3 %) presentan taxas mensuais positivas. Pola súa banda, Enerxía (-3,9 %) e Bens de Consumo Duradeiro (-0,4 %) rexistran taxas mensuais negativas.