Por sétimo día consecutivo volven medrar os positivos por coronavirus no conxunto de Galicia. Son xa 260 casos activos, once máis dos que había onte.

As áreas sanitarias de Lugo e da Coruña son as máis afectadas. O menor número de casos rexístranse en Ourense e Ferrol.

Dos 260 casos, 250 están en seguimento nos seus domicilios, nove permanecen en unidades hospitalarias e hai unha persoa ingresada na UCI.

Os falecidos por coronavirus mantéñense en 619 e as persoas curadas son 11.262.

A área de Lugo segue sendo a que rexistra máis positivos, cun total de 80, os mesmos ca onte.

Séguelle a área sanitaria da Coruña, que ten 76 casos positivos, cinco máis dos que había onte.

Na área sanitaria de Vigo hai 49 casos activos, un menos ca onte. Aquí está a única persoa ingresada en UCI.

A área de Pontevedra ten outros 23 casos, tres máis ca onte.

Soben tamén os casos na área sanitaria de Santiago-Barbanza, que rexistra 23 positivos, dous máis dos que había onte.

Sanidade dá por controlado o brote de Arzúa, que afectou seis persoas da mesma familia pero que non está relacionado con outro gromo de hai unha semana e que afectara outras tres persoas.

Onde hai menos casos de coronavirus é nas áreas sanitarias de Ourense e Ferrol. A primeira delas, con 7, rexistra un máis ca onte; a segunda, con só dous casos, ten tamén un máis ca onte.