Coudet tira da canteira para facerlle fronte a un dos equipos máis en forma da Liga. O Celta recibe o luns o Sevilla en Balaídos e non poderá contar con Jeison Murillo, sancionado pola expulsión por dobre cartón amarelo no último partido, nin tampouco con Néstor Araújo, que non está recuperado da lesión muscular. Ademais de Aidoo, único central dispoñible, será a oportunidade de José Fontán. O arousán apunta a titular. Ten ficha do filial pero adéstrase co primeiro equipo. Debutara contra o Barça en outubro. E no partido co Alavés entrou para ocupar o posto do expulsado Murillo.