Un espectáculo pirotécnico sobre o monte Rushmore iniciou as celebracións do 4 de xullo, o día da Independencia dos Estados Unidos, coa presenza do presidente Trump e da primeira dama, Melania. O lugar é coñecido polos rostros de catro exmandatarios tallados sobre a montaña, o que aproveitou Trump para defender os monumentos do país, cando se debate sobre o seu significado e o racismo.

O acto desenvolveuse sen respectar as regras de distanciamento interpersoal recomendadas polas autoridades sanitarias e poucos dos asistentes levaban máscara, medida que nalgúns lugares do país xa se esixe obrigatoriamente ante o brote de casos de covid-19, disparados nas últimas datas. O presidente Trump aproveita este 4 de xullo para axitar a división e denunciar o que considera o novo fascismo da extrema esquerda.