O exministro do Interior Jorge Fernández Díaz negou este venres ante o xuíz que coñecese a Operación Kitchen, sobre unha suposta espionaxe ao extesoureiro do PP Luís Bárcenas, e asegurou que nunca recibiu instrución algunha do expresidente do Goberno Mariano Rajoy nin da exsecretaria xeral do PP María Dolores de Cospedal. 

Durante a súa declaración como imputado na Audiencia Nacional, o exministro explicou que se decatou desta suposta operación pola prensa e desmentiu a versión que deu este xoves o seu segundo, o exsecretario de Estado de Seguridade Francisco Martínez, segundo informan  fontes xurídicas. Neste sentido negou que, como dixo Martínez, lle pedise que comprobase se o chofer de Bárcenas, supostamente captado como confidente para a suposta espionaxe, era colaborador policial, á vez que rexeitou que as mensaxes que, segundo Martínez, se intercambiaron sobre a operación e que este rexistrou ante notario fosen súas. 

De acordo coas fontes consultadas, asegurou que nunca recibiu instrucións nin de Mariano Rajoy nin de María Dolores de Cospedal, nin de ningunha persoa allea ao Ministerio do Interior. É máis, indicou que, se se producise tal operación, sería unha deslealdade que o ministro do Interior non a coñecese.

Fernández Díaz, que só declarou a preguntas do xuíz e do seu defensa, explicou que cando vía algo relacionado con Bárcenas, consultaba a Martínez para estar ao tanto do que ocorría para as súas comparecencias públicas. Ante o descoñecemento mostrado polo exministro acerca da operación, nun momento do interrogatorio o xuíz díxolle que parecía que neste asunto non se decataba de nada, e mesmo noutra ocasión chegou a opinar que aquilo era "deprimente", segundo as fontes. 

Fernández Díaz asegurou que nunca recibiu o excomisario José Villarejo no seu despacho, senón que só houbo algún saúdo protocolario.