Decenas de feirantes sen papeis protestaron no mercado de Frigsa, en Lugo. Debido ás restricións impostas por mor da pandemia, a Policía Local non lles permitiu vender roupa na zona onde se instalan habitualmente.

Ana Montoya, vendedora ambulante, di: "Viñen ás nove e media e xa estaba a policía aquí. Dixéronnos que non podiamos montar. Que había orde de que non nos puxésemos por parte da Alcaldía".

Ángeles Montoya, tamén vendedora ambulante: "Nós é certo que non temos papeis. Estámolos esperando, e non nos enfadamos porque outros si poidan vender, senón porque tamén temos dereito a comer".

Posteriormente, os feirantes levaron a súa protesta á casa do concello, onde ciscaron roupa ás portas do edificio. Posto que non lles deixan vender no mercado, os afectados reclaman compensacións.

Violeta Marín, vendedora ambulante: "Non temos papeis, así está a cousa, e non sabemos que facer. Como podemos pagar a taxa? Por que non se nos permite? Se gañamos 30 euros aí e depositamos 500 ou 1.000 euros, que facemos? Non facemos nada. Hai que ver como podemos facer, que así xa non podemos".

Mari Carmen Bentos, outra vendedora ambulante: "Eu teño catro nenos para manter. Pedimos unha bolsa de comida e non nola dan, nin o Concello nin as asistentas sociais. A nós non nos axuda ninguén, e un recibo da luz tampouco o podemos pagar. Eu o que lle diría á alcaldesa é que por favor nos deixen vender, porque vivimos ao día".

"Son xente que non ten recursos económicos suficientes e esta é unha axuda para que poidan darlles de comer aos seus fillos", sinala un cliente habitual.

Debido á actual situación sanitaria, as autoridades municipais só permiten que vendan no mercado os comerciantes rexistrados, que se instalan por orde de chegada e con prioridade para os censados na cidade.