O presidente galego, Alberto Núñez Feijóo, confirmou que se vai proceder a próxima semana ao levantamento de emerxencia sanitaria que leva activa en Galicia 19 meses, desde marzo de 2020, porque "se ve, agora si, a luz ao final do túnel", afirmou.

Con todo, no primeiro debate de política xeral desta lexislatura, que se inciou cun recordo para Valeriano Martínez, o falecido conselleiro de Facenda, Núñez Feijóo dixo que, a pesar de poñer fin á parte máis dura da pandemia, aínda será necesario manter medidas de protección, polo que pediu recuperar "a normalidade con sensatez ata que vexamos a evolución no outono e inverno, como din os expertos".

O presidente da Xunta asegurou que "estamos nunha nova etapa" grazas á estratexia de vacinación que permitiu "eliminar as restricións por municipios ou un incremento das capacidades", pero que será preciso continuar con esas medidas, que se levarán a cabo "cos instrumentos que permite a Lei de saúde pública" aprobada hai varios meses no Parlamento autonómico.

Feijóo pediu non "esquecer o que deixamos atrás" nin as vítimas que deixou a pandemia sanitaria, e con este fin, Galicia, tal e como avanzou, prevé erixir un monumento en memoria dos falecidos e tamén para homenaxear os que traballaron sen descanso na pandemia e conseguiron que o proceso de vacinación fose "un éxito".

Escolas infantís

Núñez Feijóo anunciou na intervención que todas as escolas infantís, tanto as públicas como as privadas, serán gratuítas a partir do próximo curso, non só para os segundos fillos, como xa establecera o Goberno galego, senón tamén para os primeiros.

Asegurou o presidente da Xunta que, desta maneira, Galicia sitúase "á vangarda" en España, cunha medida que non existe en "ningún outro lugar" do Estado e que se implantará en 2022.

Núñez Feijóo fixo este anuncio logo de lanzar unha advertencia: "o reto demográfico é o problema número un de Galicia" e que "a vitalidade da poboación de mañá depende da altura de miras" que se teña hoxe para afrontar esta problemática.

Recuperación da actividade sanitaria

O presidente da Xunta tamén confirmou que Galicia "volverá estar preparada" para administrar a terceira dose da vacina contra a covid-19 en base ás decisións sobre a orde de administración e no momento en que o fixen os expertos.   

Ademais, explicou que outra das "prioridades" no ámbito sanitario, ademais de estar preparados para "poder reaccionar con maior rapidez ante as previsibles mutacións do virus", será completar o plan de recuperación da actividade asistencial ordinaria que se perdeu nos meses de confinamento.   

Feijóo tamén asegurou que a saúde mental será un ámbito de preocupación para o Goberno galego, que este mes presentará un mínimo de 50 novas solicitudes de acreditación para poder ter máis unidades formativas de novos médicos.

Incremento do gasto social

Nos orzamentos do ano 2022, o gasto social "aumentarán ata o 71,1 %". "Non, nós non necesitabamos unha pandemia, porque sabiamos que blindar os servizos públicos antes e despois era unha prioridade", manifestou Feijóo, quen concretou que para atención primaria ten un orzamento previsto que representa "un terzo" do gasto sanitario para o ano que vén.   

Feijoo tamén propuxo un debate "profundo" sobre a telemedicina e avanzou que se implantará "a oitava área sanitaria" do Sergas, que se trata dun "centro sanitario virtual", con uso de Big Data, intelixencia artificial e Internet. 

Modelo de residencias

Feijóo avanzou que "a partir do ano 2022" Galicia comezará a implantar un novo modelo de residencias "máis ambicioso e vangardista" de toda España que, entre outras cuestións, incluirá unidades de convivencia de 25 persoas como máximo.   

Entre outras medidas tamén anunciou a creación das primeiras unidades de coidados intermedios, en que se atenderá as persoas que logo de recibir a alta nun hospital necesitan acompañamento social durante un determinado tempo.   

Así mesmo, indicou que se lanzará o primeiro plan de formación continuada do sector residencial e que se implementará un cadro de mandos a nivel autonómico para seguir en tempo real a situación das residencias.   

Ampliación do plan de rescate

A Xunta de Galicia lanzará nos próximos días unha nova convocatoria do seu plan de rescate para os sectores máis afectados pola crise derivada da pandemia do coronavirus, co que pretende "corrixir" as "deficiencias" que cre que presenta o do Goberno central.

Núñez Feijóo engadiu a esta medida a dun programa específico de apoio financeiro ás empresas, que incluirá por primeira vez "préstamos parcialmente reembolsables", é dicir que os emprendedores non terán que devolvelos completamente se fan un investimento que xere riqueza e emprego.

Feijóo agarda que nos próximos meses se produza un levantamento das medidas de protección de maneira "gradual" e non "abrupta", polo que reclamou ao Goberno central que reforce os mecanismos de transición para os traballadores que seguen en ERTE.

Viabilidade dunha fábrica de fibras téxtiles

Feijóo avanzou que o seu Goberno vai propoñer que se estude a viabilidade de que a fábrica textil a base de celulosa se instale na provincia de Lugo. No seu discurso, cargou contra "o desmantelamento do tecido industrial" e coa "política enerxética" impulsada polo Goberno central que pon en perigo "case 17.000 empregos", dixo o presidente da Xunta.

Neste sentido, ademais de propoñer estudar a viabilidade de situar esta planta na provincia de Lugo, volveu a reclamar a "intervención temporal da planta de Alcoa por parte do Goberno central", así como unha solución que impida o peche de Vestas en Viveiro.   

Ademais, en canto á comarca de Ferrolterra, avanzou que a Xunta porá en marcha unha nova delegación da Xunta en Ferrol e pedirá ao Executivo estatal que cre unha Zona Franca nesta área. 

Por último, no caso de Pontevedra, destacou que a Xunta deu traslado esta semana ao Consello Consultivo a proposta dos traballadores de Ence para que os terreos da fábrica queden adheridos ao Porto de Marín.

Compromiso co Xacobeo

Feijóo ratificou o compromiso do Executivo autonómico co Xacobeo 2022, ano en que se estenderá este feito por primeira vez de forma bianual na historia do Camiño, e reclamou ao Goberno central reforzar o seu compromiso, coa medida específica de estender as desgravacións fiscais todo o ano 2023.   

Lembrou que se alcanzaron as 140.000 compostelas outorgadas tres meses antes de finalizar o ano, o obxectivo que a Xunta se marcou para todo 2021. Remarcou que o seu goberno traballa no plan estratéxico Xacobeo, que suma 247 millóns e garante "uns camiños de Santiago acondicionados, unha rede de albergues máis forte con 14 deles novos e un Monte do Gozo revitalizado ou as entradas a Santiago melloradas".   

Ademais, avanzou que Turismo traballa para "poder desenvolver o próximo ano" todos os eventos culturais e festivos que este ano non foi posible levar a cabo. "A programación estará á altura do que nos perdemos nos últimos meses", proclamou Feijóo sobre 2022, ano no que Galicia espera tamén contar coa visita do papa. 

Área única de transporte 

Outra das medidas que tamén anunciou Feijóo foi a creación dunha área única de transporte en toda Galicia, que suporá tarifas igualitarias en todos os concellos e transbordos gratuítos e máis descontos, entre eles a familias numerosas.

Feijóo explicou que o plan da Xunta é bonificar case 18 millóns de desprazamentos no transporte público cada ano.

En materia de transporte tamén lanzou críticas ao Goberno central, sobre todo pola chegada do AVE, prevista para finais deste ano, pero que "se volve aprazar en todo o territorio como mínimo ata o verán de 2022", dixo.

Feijóo lamentou que se empece a prestar o servizo cos trens actuais e non cos AVRIL comprometidos. Iso supón, dixo o presidente da Xunta, que os galegos non terán alta velocidade, "senón só unha redución de tempos".

Tamén dixo que a Xunta estará "expectante" sobre os argumentos do Goberno central ante a comisión europea respecto ás prórrogas da concesión da AP-9 e seguirá insistindo na transferencia das competencias a Galicia.

Reivindicación dos 40 anos de autogoberno

Alberto Núñez Feijóo centrou o último tramo do seu discurso no Debate sobre o estado da autonomía cunha reivindicación dos 40 anos de autogoberno, cando se cumpre este aniversario da promulgación do Estatuto.   

Ademais, proclamou a "moderación galega" e subliñou o modelo autonómico, un "modelo apto para diferentes proxectos políticos" nun período democrático no que gobernaron todas as forzas políticas que están presentes na Cámara autonómica.   

O discurso pechouse cun emotivo recordo de novo ao conselleiro de Facenda, Valeriano Martínez. Del, dixo que era "servizo público" e esperado que os seus "soños inspiren os próximos pasos que ten que dar Galicia". 

Durante eses últimos minutos, Feijóo referiuse á violencia machista, que Galicia "debe seguir combatendo", pero tamén matizou que "a maioría dos problemas das mulleres de Afganistán, afortunadamente, as mulleres galegas non as teñen". "Facer semellante comparación é un insulto que non se merece", sinalou.