A italo-estadounidense Fiat Chrysler e o grupo francés PSA, fabricante de Citroën e Peugeot, confirmaron hoxe nunha nota conxunta que "planean unir forzas" para converterse na cuarta compañía automobilística do mundo con sinerxias estimadas en 3.700 millóns de euros e sen pechar fábricas.

No comunicado explícase que este diálogo en curso abre "o camiño á creación dun novo grupo de dimensións e recursos globais, mantidos nun 50 % polos accionistas de PSA e polo 50 % dos de  FCA".

Anúnciase ademais que a nova sociedade baixo unha empresa matriz holandesa "tería representación equilibrada e maioría de conselleiros independentes" e que o presidente sería John  Elkann (actual presidente de FCA), mentres que o conselleiro delegado sería Carlos Tavares (actual presidente de PSA).

A fusión, engaden, "crearía o cuarto fabricante de coches do mundo por vendas anuais cun total de 8,7 millóns de vehículos" e ingresos combinados de case 170.000 millóns de euros e un resultado operativo de máis de 11.000 millóns de euros.

Inicialmente, "a compañía resultante da fusión beneficiaríase de marxes entre os máis altos en mercados onde está presente, baseados na solidez de FCA en América do Norte e Latinoamérica, e a de PSA en Europa".

Ademais combinaríase "a forza das marcas dos dous grupos nos segmentos de luxo, premium, vehículos de pasaxeiros convencionais, suv, camións e vehículos comerciais lixeiros, facéndoos aínda máis fortes".

"A compañía resultante da fusión combinaría a ampla e crecente experiencia de ambas as compañías nas tecnoloxías que están a dar forma á nova era de mobilidade sustentable, incluída a propulsión eléctrica, a condución autónoma e conexión dixital", engade o comunicado.
Ambos os consellos de administración deron aos respectivos equipos un mandato "para alcanzar nas próximas semanas un memorando de entendemento vinculante".

Na nota, Tavares explicou que "esta converxencia crea un valor significativo para todos os accionistas e abre un futuro brillante para a compañía resultante da fusión. Estou satisfeito co traballo realizado ata o de agora con Mike Manley (conselleiro delegado de FCA) e estarei moi feliz de seguir traballando con el para construír xuntos un grupo grande".

Pola súa banda, Manley sinalou que está "feliz de ter a oportunidade de traballar con Carlos Tavares e o seu equipo nesta agregación que ten o potencial de cambiar o sector. Temos unha longo historia de cooperación exitosa con PSA e estou convencido de que, xunto con toda a nosa xente, podemos crear unha empresa líder mundial en mobilidade".

A nova empresa matriz con sede nos Países Baixos cotizaría en Euronext (París), a bolsa italiana (Milán) e a Bolsa de Nova York e continuaría mantendo unha presenza importante nas actuais oficinas centrais de operación en Francia, Italia e nos Estados Unidos.

Este novo proxecto de fusión prodúcese despois de que Fiat hai uns meses presentase unha oferta para unirse coa rival desta, Renault, e que fracasou debido á falta de apoio do Goberno francés e do seu socio Nissan.

Nesta ocasión o ministro francés de Finanzas, Bruno Le Maire, bendí a fusión e di que responde ás necesidades do sector automobilístico ante os desafíos dos próximos anos. E non se trata dun simple visto e prace, xa que o Estado francés posúe o 12 por cento das accións de PSA a través do BPI, o Banco Portugués de Investimento.