CRTVG

Buscar

Facenda mantén o inicio da campaña da renda o 1 de abril

Publicado o 19/03/2020 09:04
Facenda mantén o inicio da campaña da renda o 1 de abril

O Ministerio de Facenda mantén o 1 de abril o inicio da campaña da renda de 2019, que conta entre as súas novidades cunha simplificación na consignación dos inmobles, segundo publica este xoves o BOE.

Facenda publicou os modelos de declaración do IRPF e o imposto de patrimonio de 2019, cuxo prazo de presentación mantense entre o 1 de abril e o 30 de xuño, a pesar de que boa parte dos trámites administrativos e tributarios víronse afectados pola crise do coronavirus.

Entre as novidades do borrador figura a simplificación da consignación de inmobles propiedade do contribuínte, que agora figurarán nun único apartado no que se indicará o uso que tivo cada un deles durante o exercicio.

Para facilitar a declaración das rendas de inmobles que estivesen alugados, o borrador desagrega os conceptos necesarios para calcular o rendemento neto de capital, como gastos deducibles ou amortización.

Tamén se simplifica a identificación do domicilio fiscal do contribuínte, que figurará nun apartado separado, e a declaración de rendementos de actividades económicas de estimación directa.

A exposición de motivos da orde ministerial explica que estas modificacións están en liña cos obxectivos de reducir cargas fiscais indirectas, mellorar a asistencia ao contribuínte e lograr unha administración tributaria máis eficiente.

Como na última campaña, todos os contribuíntes poderán acceder ao seu borrador a través do programa Renda web identificándose con certificado electrónico, cl@ve PIN ou número de referencia, onde poderán modificalo, confirmalo e presentalo.

Ademais de por internet, as declaracións poderanse presentar por teléfono -a través do plan "Chamámoslle"- ou presencialmente nas oficinas da Axencia Tributaria.