Unha persoa morreu este luns ao estrelarse un helicóptero mentres realizaba unha aterraxe forzosa nunha azotea dun rañaceos de Manhattan, preto de Times Square, en Nova York, segundo confirmou o Departamento de Bombeiros da Cidade.

O Departamento de Policía de Nova York informou de que o suceso tivo lugar ás 13:43 horas á altura do número 787 da sétima avenida, coa rúa 51, provocando un incendio na azotea que xa foi extinguido, aínda que se puido apreciar unha importante columna de fume.

O concelleiro neoiorquino Corey Johnson asegurou, citando fontes policiais, que o falecido no sinistro é o piloto do helicóptero. Os equipos de emerxencia, cunha dotación dun centenar de bombeiros, seguen traballando na zona debido a que se produciu un escape de combustible do aparello. O incidente produciuse nunha xornada caracterizada pola abundante choiva na cidade.

Ata o momento descoñécense as causas que levaron o piloto a realizar unha aterraxe de emerxencia. Numerosas unidades de Bombeiros e Policía acudiron ao lugar, situado preto do Museo MoMa e do centro Rockefeller, acordoaron a zona e pediron aos habitantes da cidade que non se acheguen ao lugar do sinistro mentres continúan as operacións.